Policia e Kosovës, përmes Njësisë për Ndërhyrje të Shpejtë (NJNSH), ka ndërmarrë një veprim të suksesshëm operativ në pikën e kontrollit afër pikëkalimit kufitar Kosovë–Serbi (Jarinjë), ku është ndaluar një autobus me targa (NP), i linjës Mitrovicë–Beograd.

Gjatë kontrollit të detajuar të mjetit, është konstatuar se në katin e parë të autobusit ndodheshin 8 udhëtarë të rregullt të regjistruar në listën zyrtare, ndërsa në katin e dytë u gjetën 18 shtetas të huaj, të paregjistruar dhe pa të drejtë hyrjeje apo kalimi në territorin e Republikës së Kosovës.

Gazeta Sinjali raporton se autobusi i përket  kompanisë “Joe Travel”, i cili operonte në linjën Mitrovicë–Beograd, ndërsa të dyshuar për këtë tentim kontrabande janë pronari i agjencisë dhe shoferi i autobusit, Branislav Djurgjević, të cilët sipas hetimeve fillestare dyshohet se ishin të përfshirë drejtpërdrejt në organizimin e transportit të migrantëve.

Në mesin e personave të ndaluar ishin: 5 shtetas palestinez, që kishin hyrë në Kosovë me pasaporta jordaneze, 6 shtetas nga Bangladeshi, me viza pune, por me vendim largimi nga Kosova, 7 shtetas egjiptian, që kishin hyrë nga Shqipëria dhe synonin kalimin në Serbi e më tej në BE.

Shoferi dhe pronari i agjencisë janë shoqëruar në stacion policor, ku pas intervistimit në prani të avokatëve mbrojtës, ndaj tyre është shqiptuar masa e mbajtjes.

Ndërkohë, migrantët janë trajtuar sipas procedurave ligjore nga Drejtoria për Migrim dhe të Huaj.

Policia e Kosovës ka theksuar se ky operacion është dëshmi e përkushtimit për të luftuar migrimin e paligjshëm dhe kontrabandën me njerëz.

LEXO EDHE:

Parandalohet kontrabandimi me migrantë në Jarinjë, policia gjen 18 shtetas të huaj në autobusin Mitrovicë-Beograd